Exodus 15
Mosese ge Miliyami wali Wona
1 aYaka Mosese alonau Isileli wona ya hi wonaan Yehoba elana:Na wona Yehoba elana kaiwena Itipita i pakokovel hoti,
hosi ge ali tomatahikan i aliyohiliek hogaa.
2 bYehoba iya o libu gasigasisena,
iya i pwamwalau.
Iya no Yabowaine, inoke na tobalan,
iya nam wana Yabowaine, inoke na lowasawasa-an.
3Yehoba iya toasiyala;
iya alana Yehoba, iyoho ya i gangan.
4Kin wana tolohaveyan ge wana waga momomol i aliyohiliek hogaa;
wana toematana waiwaisal hi ununa Hoga Keketina.
5Hoga i yabomwil;
i ola pat hi lobek limwana.
6Yehoba, nimwam awom ana gasisi i bwata;
Yehoba, nimwam awom topihigelgel i tagalekaleka-agil.
7Wam gasisi eliyana am topihigelgel u bwata lakel;
wam huga i tau i ola ginaha ge hi kalas haba hi ola musamusa.
8Wam yana eliyana hoga u huven papahe;
i milil sapu i ola baba;
hoga limwalimwanina i milil i gasisi.
9Ama topihigelgel hi hanaha hi ba, “Ta tatauliulil-agil inoke ta kukuhikagil,
ge wali gogomwau ta ahe ta guyauan, he toto nuwala gegewena ta bugulan.
Haveyan kilepana ta ahe inoke ta apapanak-agil.”
10Yehoba, wam yana elana hoga u huven yaka i yabomwil,
hi lobek hi ola patbon hoga lolovakunina elana.
11Yehoba, henala eba ni ola owa yabowaine ona gamwaliyaa? Nige etega.
Henala eba ni ola owa, kaiwena u bwabwalena hot? Nige etega.
Henala eba i bosowaina ginol yawiyawi gasigasisena ni ginol ni ola owa? Nige etega.
12Nimwam awom u paelu,
yaka bilibili ama topihigelgel i tinonil.
13Yaka u pwamwalima inoke alona wam nunuwana nu houwa-agima,
wam gasisi elana nu nulima ge naha tuka panuwa toto aloma owa ta minaa.
14Panuwa ona wasa nihi hago, yaka alona wali lovakun nihi ginuginu.
Lovakun Pilisitiya ni yowanil,
15panuwa Idom ana tonowakau ateliya ni bwanabwana,
Mowabi ana toasiyalau nihi ginuginu,
ge Kenani gamagaliliyau tuwaliya ni sasawowol.
16Lovakun ge ati bwanabwana nihi kalaopopwi.
Yehoba, wam gasisi nihi kite yaka nihi mibabakuhu
ana siga naha nopalegel,
ama wam gamagal bolo u pwamwalima.
17Inoke abwe nu ahema ge nu en telema wam oya elana.
Yehoba, panuwa o iyaka u hile wam abamina,
labi bwabwalena toto Babala totom u ginol.
18Yehoba, owa nu tologugui sauga gegewena nige ni momowasi.
19He Isileli hoga hi nosolaan hi nawaa datu pwatanaa, yaa sauga Itipita wali waga momomol ginebi wali hosi ge ali tomatahikan hi ulutuk hogaa, yaka Yehoba hoga i pabini pasikal ge i yabomwil. 20Inoke Eloni nuna Miliyami, iya palopita, wana tambalin i ahe, yaka evenakau gegewel i houwaagil ginebi wali tambalin hi sagasaga. 21Miliyami i wona i ola:
Ku wona Yehoba elana kaiwena Itipita i pakokovel hoti,
hosi ge ali tomatahikan i aliyohiliek hogaa.
Isileli Hi Nawanawa Hi Na Oya Sainai
(15:22—18:27)
Wewel bolo Mala ge Ilima
22Yaka Mosese Isileli i nulil Hoga Keketina hi tataluwai hi noek Sula Ulaina elana, labi kekekevana. Lan eton hi nawanawa uleya, yaa nige wewel etega hi pwapwawa. 23Sauga hi vin panuwa Mala, he wewelina amnana i nak, yaka nige bosowailiya nihi im. (Heiya te kaiwena alana hi tun Mala.) ▼ 24Yaka gamagalau Mosese hi lovehawol-an, ge hi nel hi ba, “Hauna ta im e?” 25Yaka Mosese i awanun nabinabi Yehoba elana, inoke Yehoba ebwakil etega i pankite ge i ahe i alilowana wewela, yaka wewel amnana i waisi.He panuwa o elana Yehoba Isileli ali logugui i pek ge i labosel. 26I ba, “Ebo nau Yehoba wami Yabowaine anau nuku hago bubun, wami ginol ni sapu matawa ge no logugui gegewena nuku henapuan, inoke gila ololana ya pek Itipita elal nige etega na pepewa. Nau Yehoba ami topwapwamolu.”
27Yaka abwe hi na Ilima. He wewel bwanapitpit elulutega eluwa (12) ge deit puna sebenti (70) heliya iyoho to, inoke hi holaviya wewel bebenaa.
Copyright information for
MPX